靚次伯中學真心唔好入去讀

本帖最後由 dunNga 於 21-12-26 23:15 編輯

我對呢間學校嘅第一印象就係，雖然係band 3，但我見佢哋嘅校風都算唔錯，又見到曾校長同老師都好似好好人噉，再加上我個仔成績本身就唔係太好，我本人係想佢即使讀書差都唔好畀人教壞，所以最尾就決定選擇呢間中學，最後都成功派咗入去。入到去先發現好唔對路，我個仔同我講學校內部根本就唔團结，個個高層淨係諗住自己，啲高層就直接四點三準時走人，走嗰時同啲老師講繼續加油。有啲老師聽完學生講嘅心事後，直接當八卦同其他老師分享，完全係冇私隱。同埋有一啲老師對曾校長有好多不滿，有啲課室嘅枱枱凳凳已經比較殘舊，尤其是係中四至中六嘅課室，我個仔同我講話中一至中三嘅枱凳凳坐得舒服，去到中四就全部都係爛枱爛凳，我唔明點解學校淨係翻新啲低年級嘅課室，高年級就由得佢哋死噉，仲有學校啲投影機成日都壞壞地，有啲基本上係好明顯係故障，但係都冇人去換，某一位副校長曾經講過話「我哋係冇嘢叻，不過錢就有大把」呢句真係佢親口同啲學生講嘅。仲有校務處嗰啲行政效率真係好低，上年7月結業禮嗰陣，我個仔就拎咗最佳進步獎，然之後學校係要畀500蚊書卷獎勵佢嘅，但係到而家都仲未收到。呢間學校係唔比學中午生出去食飯，只能夠留喺學校食，後尾我聽學校啲老師講話，原來係因為學校都知道有一啲學生好鬼曳，唔想佢哋出到去影響學校聲譽，但問題係其實啲學生都好慘嗻，有啲學生食完飯都唔知做咩好，好似喲樹噉樣企喺飯堂，周圍遊蕩，唔講仲以為坐緊監。有啲老師根本就已經放棄咗學生，叫啲學生返屋企做完功課，做完之後聽日返嚟直接對答案，係真係直接show曬答案出嚟叫學生自己抄返好，仲有學校嘅訓導組，成日都呢樣唔俾嗰樣唔俾，我明佢哋係想校風好，但係都唔使咁樣啊，我就以幾日前嘅聖誕聯歡會舉例子，有啲人著咗啲公仔衫返嚟喺度影相，之後曾校長見到之後直接黑面走咗，好似好唔妥班學生噉，我心諗，唔係啩，聖誕聯歡都唔俾人著公仔衫返學 噉不如唔好搞聖誕聯歡，改為上課天算la。有一次我個仔諗住去校務處問一啲嘢，點知問問下就俾佢串返幾句，佢哋嘅態度真心我都覺得唔得。呢啲嘢全部都係我個仔同我講嘅，我一開始聽嗰陣，都覺得有冇咁誇啊，但係而家我已經真係覺得呢間學校真係冇得救。不過，如果硬係要我讚一樣嘢個話，就係佢哋嘅「包裝」真係好好，我當初就係見佢哋老師又有禮貌，校長又成日鼓勵學生，先俾佢呃咗入嚟，奉勸各位家長搵中學嗰陣，定唔好俾表面嘅野呃到，如果唔係好似我噉，原本聽到噉我都想幫我個仔轉校，但無奈佢而家都高中，轉嚟都冇乜用，如果可以俾我再揀，真係寧願入一間差啲嘅band 3，都唔要入你這間靚次伯中學。