【短片】DSE狀元教路:勿開夜車 籲考生放鬆心情戒吃刺激食物

【短片】DSE狀元教路：勿開夜車　籲考生放鬆心情　戒吃刺激食物






■本屆DSE核心科目筆試將在明天起展開。




中學文憑試（DSE）主科明天開考，去年DSE兩名狀元陳樂邦及劉曉晴已入讀醫學院。兩位醫科生以過來人身份，建議臨近考試考生不要過份操練，「最緊要唔好咁chur」。陳樂邦會在試前一周調節作息，早睡早起，並避免吃刺激性食物如咖喱，以防臨時出現不適。






去年DSE超級狀元陳樂邦，現就讀港大醫學院。陳於文憑試修讀八科：中文、英文、數學、通識、物理、生物、化學及數學延伸部份單元二，全部獲得5**成績。作為DSE過來人，陳稱臨近考試不會開夜車，應放鬆心情、減少操練，務求「考試前以最健康嘅狀態去考」。


「我喺考試前一星期會調整自己嘅身體，例如8點半開考，前一星期開始7點起身，等自己身體可以習慣早起，當然都會早啲瞓。」除保持充足睡眠，他在試前一周會保持良好飲食習慣避免臨時腸胃不適，「唔食咖喱、煎炸嘢呢啲刺激嘢。你諗吓考試時個口痱滋痛，都會distract（分心）咗！」


考試當天陳樂邦更注意飲食，雖然有同學會喝咖啡及能量飲品提神，「我自己就飲花旗參提神，出門搭車我會食吓薄荷糖，非常有用。」吃早餐會「食一份令到自己舒服但又夠能量嘅早餐」；考試之間的休息時間，陳直言不會吃太飽，「食完lunch會飯氣攻心，所以都係食啲嘢、填吓肚就算；我自己就會選擇食energy bar（能量棒）補充體力。」


「溫唔晒都唔好最後一晚衝」


不少考生都要面對「溫唔晒書」的難題，陳直言「我自己DSE時都追唔到個schedule（時間表），唔夠時間溫；我最後揀咗去記啲自己成日錯嘅point同背吓formula」。「就算溫唔晒，都唔應該最後一晚先衝，因為咁樣啲記憶唔會好；不如溫吓啲精華筆記、睇啲雞精書好過；我自己亦唔會操卷，操得太累會影響考試當日嘅狀態。」


考試前一日他會開始放鬆，「彈吓琴、跑吓步；食晚飯前先溫吓書，但都唔會溫太耐，以免令自己太攰」。陳又指考試最重要保持正面的心情。


至於拔萃女書院狀元劉曉晴則建議溫習應選擇環境較寧靜的地方，「有啲人會去連鎖咖啡店，但背景音樂太嘈又多人」。她習慣在考試當日飲用能量飲品補充糖份，「飲咖啡驚考試中途會想去洗手間」。又建議要帶外套進試場。