醫學院男女比例　港大陽盛　中大陰盛

【明報專訊】署理食物及衛生局長徐德義噚日書面回覆立法會議員葉劉淑儀嘅問題，透露兩大醫學院收生男女比例，發現原來「一海之隔」都幾唔同。香港大學醫學院過去5個年度收咗1142個學生，男女比例為54：46，連續5年都係男仔多啲，好似2018/19年就係137個男仔對106個女生。中大醫學院相反，過去5年有4年都係女多男少，5年收嘅1193個醫學生裏面，男女比例為48：52，即使2017/18年男多過女，都只係多3個男仔；2016/17年男女比例相差最遠達45：55。

點解中大會收得多啲女仔呢？中大醫學院噚日就同Emily講，性別唔係收生嘅考慮因素，收生標準係以擇優而錄、公平公正為原則，除咗公開考試成績，仲會考慮考生校內成績、課外活動同面試表現。


其實無論係中大定港大，男女比例都好接近，可謂巾幗不讓鬚眉。但從過去5年度數據睇嚟，中大醫學院女考生都相當出色，往往可以擊敗眾多同屆男同學，想入中大醫學院嘅男同學要加把勁喇！