請幫忙判斷讀障機會高唔高

本帖最後由 瑩mama 於 17-5-22 16:47 編輯

囡囡K3,5歲半。平時轉數都快，好奇，愛問問題，愛看書，社交無問題，認字也很多。但做功課嘅時候就變另外一個人，脾氣好差，開始寫咗4個字就可以話好攰，好辛苦，做功課時又會自言自語(口up up咁)，寫得唔好要求佢改正，佢就會大喊，發脾氣，話好辛苦。講咗好多次要點寫，都總會係錯，唔係錯呢度，就錯第度。寫字唔會爆格但部件一大一細，上大下細，一高一低。橫線上寫句子空間感好差，左右部件分太開，或者同第個字癡太埋，大細字等。做功課唔專心會畫書檯，或者畫花功課。有少數時候會左右部件調轉字寫，少數會出現反字。我已經好有耐心教，但佢心情總係好波動。佢話功課自己只係中意連直線，畫畫，圈字。其他油顏色，跟點畫線，有框有底線寫字都唔中意。佢只係中意係白紙上寫字，寫出黎句子通順嘅唔多，會漏字。有少數時候bd, pq會調轉，英文串字根本記唔到。數字排序，經常雙位數會調轉黎睇12睇成21。見到佢真係好辛苦，大家覺得佢有書寫困難症嘅機會高唔高？我真係好想帶佢去評估，但我老公堅決話唔需要，話只係佢未熟練字。如果佢真係有書寫困難，我唔想佢一直俾身邊老師長輩誤解係比其他同學懶散。令到佢冇曬信心，冇人支持佢，明白佢。