語言障礙

本帖最後由 Amy092 於 17-2-21 05:07 編輯

我囝囝下個月3歲，到而家都仲係講單字同bb話多。係兩歲半既時候都開始發覺佢講野唔得，一直都有留意個情況，同健康院講過，佢哋又話我個仔冇問題唔需要轉介。但我有次去睇兒科，醫生話我個仔講嘢方面有d問題，叫我穩陣起見去檢查下！於是寫咗轉介信俾我去尤德夫人智力評估中心，我地上年9月份見咗姑娘，姑娘話叫我大約半年後再打黎問排睇邊類型評估。10月份自己太過擔心所以自己去睇語言治療師做評估，治療師評估我個仔只有歲半語言能力，要做語言治療。語言治療因為要排waiting所以一直等...等咗幾個月今日終於第一堂。
其實呢段時間，我真係好擔心，根本冇一晚訓得好過！因為我唔知自己個仔究竟發生咩事，點解會咁樣！尤徳夫人乜嘢期都冇俾我所以我唔再等落去，我約咗3月15日去養和醫院做兒童成長及發展評估，但我真係好驚。自己睇開個兒科話就咁睇我個仔唔似有自閉症，尤德夫人姑娘都話唔似。今日上咗第一堂語言治療訓練，治療師話我個仔下顎肌肉好弱每日要做咬牙膠訓練。我想請問語言障礙係咪一定有其他問題衍生出來？例如智力同自閉症？我個仔會明白人哋講嘢意思，有眼神接觸會同人玩好痴人。唯一性格有啲固執，一有新嘗試就會好驚但如果佢見到其他人嘗試過冇問題，佢就會試。所以我都唔肯定我個仔有冇自閉症，但我真係好擔心唔知點算好