唔係曬，真係唔識教

女女三年級，五歲時已確診ADHD和社交較弱。做過一排遊戲治療，但效果唔大。一直在學校表現都好乖，成績一直徘徊全級頭十內，老師完全唔覺得佢係ADHD。但偶然人地唔小心掂倒佢，佢就大吵大鬧話人推佢撞佢。如果我地兩公婆同姐姐在埸，啲表現就仲過份，只要佢想嘅嘢就博命扭，肢體同把口無一刻可以停，只要人地有少少錯就大大聲指摘，自己錯就歪理當道理，教佢同理心就緊係話人地都係咁啦!。細時過份我地都會講吓道理，咁當然唔合作唔聽教有打嘅，我老公打得較多，所以佢由細到大都覺得爸爸偏心，後來打到我老公都怕自己收唔倒手，同佢講過合作就唔會就打，佢都應承我地，但而家越大越唔合作。我先生已經去到話唔想再同佢講道理，有時嬲得濟，寧願入房避佢。早一兩年學校社工同醫生都建議過食藥，但食咗唔見有改善。佢食12個鐘，放學返嚟未過藥，但唔覺得有收斂，所以我地都停咗，近呢兩個月兩父女又日嘈夜嘈，我都覺得佢地好煩，道理講極都唔明，打就更加唔怕，問過社工有無啲訓練可以幫倒佢，好似樣樣都唔中佢需要。我真係擔心再大啲反叛期佢學壞，都唔知可以點做…