協恩 vs 培道

本帖最後由 carmenkmc 於 21-11-24 11:31 編輯

虛心求意見
我們打算讀完小學去外國，冇咗升中壓力，所以一直冇打算催谷小朋友學術，諗住留返個愉快童年俾佢地。

囡囡喺培道幼稚園讀緊，讀得都好開心，因為全部老師都好有愛心。原本都疊埋心水原校直升小一，不過見自己係協恩舊生有20分，所以都有試吓報協恩自行收生碰吓運氣。

剛剛幸運地自行協恩收咗，現在糾結中。協恩岀名係好學校，又不用學費，其實入到係好好彩冇理由放棄。不過我聽咗好多意見話協恩好谷，初小已經要搵定外補，有點兒擔心。因為本身自己理念係唔希望小朋友要花太多時間外補學術，情願多留時間培養興趣同玩。但怕讀協恩如果唔外補會跟唔上，會打擊小朋友自信心？(唔駛佢高分，中游份子已經滿足)

培道俾我感覺雖然學術上不及協恩，但感覺好似人性化好多，好欣賞學校咁有心思起新的教育樓，同埋都好認同校長理念，成日同學生打成一片，小朋友應該會讀得好開心。不過一年要5萬學費 (2個小朋友要10幾萬，有妹妹跟尾) 又好似唔知值不值得。

請問有冇協恩用家，係咪真係好谷？好多功課測考要晚晚搞到好夜或要犧牲週末親子時光/破壞親子關係先讀得上？定應該留喺培道用錢買返個歡樂輕鬆嘅童年？

大家有冇意見我應該點取捨？