真心請教：高主教 vs 玫瑰崗

唔好意思，我諗好多家長睇到呢條題都可能覺得唔需要諗，但係我有d特別考量，想請教下大家嘅意見。

我小朋友升小一諗緊兩間中揀邊間，好明顯高主教升中成績好好多，約七成升B1，教學嚴謹，老師資歴較深，學生循規蹈矩，教學中英兼備，數學同常識科係一半中一半英咁教。不過缺點係大班教學，40多人一班，單班主任制，傳統天主教小學，較谷，每日功課最少7、8樣，校規比較嚴，壓力比較大。

玫瑰崗響另一方面來講成績差得遠，3成入B1，學校總體冇咁嚴謹，較Hea，學校活動似乎種類亦較少 。不過佢小班教學，約20人一班，雙班主任，程度ok，每日功課3-5樣，壓力較細，學生似乎較為活潑，但亦保持一定禮貌。而且英文語境幾好，同學間有時都係講英文，加上我仔仔係玫幼上，會有幾多同學一齊升上去小學，會比較開心，較容易適應。校舍雖然較舊，但地方較大較開掦，小朋友多d活動空間。

如果我地會響香港升中，我一定幫仔仔揀高主教，因為升中有保證。但係我地有八成機會會響幾年后移居外地，所以我現時偏向於選擇玫瑰崗，因為英語語境幾好，去到外國較易適應，同時亦有中文讀；另外如果去外國升學，我覺得現時無需要比仔仔受壓太大， 我想佢可以比較自由發展，多啲思考空間，應該較為適合佢嘅脾性，日後去外國升學亦更容易適應。玫小又有西班牙文讀，似乎幾好。

而且玫小超小班教學，小朋友有老師較多嘅關顧，似乎可以發揮多d。

至於話學校較hea，我有心理準備自己要跟小朋友嘅功課，必要時俾d額外練習佢做。

呢個決定最終都要自己做，不過我想請教一下大家有冇野係我忽略咗，畢竟呢個決定係比較反其道而行，非常感謝大家。